Rev. Lashi La Ja

26 May 2017

MASHA HPAGA NINGHKAP BAWNGBAN HPAWNG HTA KBC HKU NNA MUNG SA LAWM AI SHIGA

 

 International Organization for Migration IOMhku nna woi ai awn hte May shata (24) ya shani, Yangon, Park Royal Hotel kaw galaw ai Masha hpaga ninghkap lam bawngban hpawng hta KBC hku nna Rev. Lama Yaw hte Rev. Kareng Htoi Dan yan hku nna sa du bawngban shang lawm ma ai lam chye lu ai.

■Bawngban ai lam hpe IOM Director Miss. Yogo Kora hte lit nga ai ni woi awn ai rai nna Myen mung shara shagu kaw na Hkristan wuhpung wuhpawng ningbaw ningla ni, Ma Ma ni, Hpungkyi ni, Balik du ni, Upadi sara ni, NGOs,INGOs, CSOs wuhpawng ni kaw na dat kasa ni marai (46) shang lawm ma ai.

■Bawngban ai lam madung gaw Masha hpaga ga ai lam(Trafficking), Masha mayun shalai dut sha ai lam(Smuggling), Masha a htawt sit hkawm sa ai lam (Migration) hpaji lam ni sawk sagawn nna masha hpaga , masha dut sha ai lam ni hpe gara hku hkye la na lam, gara hku hpaji jaw na lam, gara hku ninghkap na lam ni hpe ladat shaw bawngban ma ai lam shiga na lu ga ai. KBC MNK

HPYEN YEN DABANG NI DE KBC DAWJAU RAMMA MARAI 85 RAWT SA WA SAI SHIGA

Amyu sha ni Hpyen yen nga ai ginra ni kaw na grau ra kadawn nga ai Masat shadaw 6, Hpare, Pajau Sha-it Yang, Alen Bum IDP Camp ni de 2017-2018 ning jawng lung ladaw hta Jawng Sara/ Saranum magam bungli hta apnawng na KBC Ramma ni marai 85 hte Chyum Jawng awng sai Sara/Saranum marai 7 gaw May shata 25 ya jahpawt KBC Ginjaw Rung kaw na rawt sa wa sai lam chye lu ai.

Ndai Hpyen yen dawjau Jawng Sara magam bungli gaw amyu sha ni hpyen yen nga ai IDP Camp ni hta nga ai Ma ni Laika Hpaji lam hta n machyi mat na matu Ginjaw Hpyenyen lakawn lanawn Komiti hku nna jasat galaw ai masing re lam, Nawku Hpung shagu de na apnawng jawng Sara/ Saranum shaga dat ai hta KBC hku nna mung laning mi marai 50 kaw na 100 grupyin shaning shagu sa du apnawng nga ai lam KBC Hpyen yen dawjau hpa-awn Rev. Nhkum Naw Bawk  hku nna shiga na chye lu ga ai.

21 LANG NA KBC LAIKA HPAJI SASANA SARA SHALAT SHARIN HPAWNG JAWNG YU POI SHIGA

PHOTO / Htoi Awng

KBC Kabu Gara Shiga hte Sasana Magam Dap hku nna woi awn let 2017 ning April shata 20 kaw nna May Shata 25 ya laman KBC Ginjaw Rung kaw Nhtoi 35 ya galaw ai 21 Lang Na Laika Hpaji Sara Shalat Sharin Hpawng Jawng yu poi hpe May shata 25 ya shani galaw lu sai lam chye lu ai.

Dai ning apnawng na Sara/ Saranum ni yawng marai 58 rai nna Jawng 15 de ap nawng na re lam, apnawng sa wa na Jawng ni gaw;

Hkahku Mung Ginwang hta

Hkindu Yang Jawng kaw marai 4

Bawm Wang Jawng kaw marai 7

Share Uma Jawng kaw marai 8

Gawnan Jawng kaw marai 4

Htoira Yang Jawng kaw marai 3

Chihpwi Ginwang hta

Myawmaw Pa Jawng kaw marai 4

Gam Hkoin Jawng kaw marai 3

Waimaw Ginwang hta

Jubili Jawng kaw marai 4

Hpungmai Yang Jawng kaw marai 3

Ningmaw Yang Jawng kaw marai 3

Maugyam Jawng kaw marai 2

Bai Myitkyina Ginwang, Gauri Jawng kaw marai 2

Htingnai Ginwang, Htaira Yang Jawng kaw marai 3

Sammung Ginwang, Kawngkye Jawng kaw marai 3

Mungmau Ginwang, Loi Yai Jawng kaw marai 5 re lam Laika Hpaji Sasana Lithkam

Sr. Hpauda Htoi San hku nna chye lu ai.

KBC a Laika Hpaji Sasana hpe 1995 ning Lawu Ga Ginwang, Awng Panglai kaw galaw ai 32 - lang na Hpung shawa hpawng hte Jinghpaw laika lu la ai 100 ning hpring Chyeju Shakawn Hpawng kaw nna Hpung shawa myit hkrum let galaw hpang wa ai re lam, Daining 21 ning laman Jawng 165 de apnawng Sara/ Saranum (820) apnawng let galaw lu sai lam, ndai masing gaw Jawng n nga, Sara/ Saranum n lu ai/ n law ai Bumring Bumga, Mare Kahtawng ni hkan na Ma ni Laika Hpaji chye lu na matu KBC a Sasana Bungli kaba langai hku masat nna galaw nga dingyang re lam, shawng daw hta Maigan ni hte matut mahkai let galaw lu sai raitim Laiwa sai 4 ning daram kaw na gaw KBC Hpung Shawa ni jaw bang ai Alu Tsaban 21 Sasana Alu, KBC Sasana Masat Laban Alu Sumbu, Laksan sak jaw ai Alu ni hte galaw nga ai re lam KBC K/S Hpa-awn Rev. Mading Hkaw Bawm tsun da ai hku nna chye lu ga ai.KBC MNK

12 May 2017

HANSON MASAT HTANGDIP GAWNG JAK NNAN NI BAI LU MARI DA SAI LAM

KBC a Labau Hkringhtawng Sali wunli langai rai nga ai Hanson Htangdip Gawng hta sen 500 jan dan ai Rep, Chywi jak kaba ni bai lu mari la sai lam chye lu ga ai.

Photo/ Htoi Awng

Ndai htangdip gawng hpe KBC hpung shawa myit hkrum ai hte 1959 ning kaw na galaw hpang wa sai re lam, ya daini 58 ning na hkra hkrung grin galu kaba wa ai hte htap 3 Rung nnan mung galaw la lu sai lam, prat hta hkan nna madang dep ai jak arung arai ni hte hpung shawa a kyu hpe galaw ya nga ai lam, byin mai ai made KBC hpe madi shadaw lu nga sai raitim ra kaba lam pru wa shagu KBC Hpung shawa a Alu jaw bang karum madi shadaw ai hku  nna galu kaba wa nga ai re lam Gawng Manager Sr. Jinghpaw La San tsun dan ai hku nna chye lu ai.

Ndai Htangdip Gawng hpe Myitkyina, Samwang lawk kaw hpaw da ai rai nna, KBC Laili Laika Magam Dap ni woi awn ai hte KBC Nawku Shakawn mahkawn buk hte kaga laili laika ni hkum sumhpa hpe dip shapraw ya nga ai lam shiga na lu ga ai. KBC MNK

LACHID LAILI LAIKA HTE CHYUM LAIKA SHARIN HPAWNG

KBC Laili Laika Magam Dap, Lachid Chyum Gale Sub Komiti kaw na woi awn ai hte Lachid Laili Laika hte Chyum Laika Sharin Hpawng hpe May shata 8 ya kaw nna 20 ya laman, Myitkyina Ginwang, Njang Dung Buga Hkalup Hpung kaw galaw nga ma ai lam chye lu ai.

Sharin Hpawnt hta Hpung magam gun Sr/Srn. ni/ Hpungup, Hpungtau ni, Ramma ni yawng marai 60 jan shanglawm ma ai rai nna, sharin ai lam ni gaw; 

 Lachid laika hpe;

Sr. Lanam Hkaw Ting (Waimaw Ginwang)

Sr. Lanam Zung Hkaw (Htoi San, Myitkyina Ginwang)



Srn. Saulang Ying Myaw (Wuyan, Waiwaw Ginwang) ni rai nna;

Rev. Lagwi Lang Yaw mahkawn sharin;

Chyum Laika sharin ai lam hpe

Rev. Dr. Mangshang Hkaw Ting (Tawng Gyi Chyum Jawng Up)

Rev. Xalang Hkaw Ying (Lachid Chyum Gale Komit Ningbaw)

Rev. Hpare Bawm Ying (Mandalay, Lawu Ga Ginwang)

Rev. Lagyawm Hkaw Luk (Waimaw Ginwang) ni sharin ya ma ai lam chye lu ai.

Ndai lamang hpe lai wa sai ten Sadung Ginra ni hta mung galaw lai wa sai lam, ndai sharin hpawng ni byin tai wa hkra maigan mungdan ni de du nga ai Lachid Oversea Group ni hku nna ja gumhpraw alu karum ya ma ai lam, matut nna Sammung hte Miwa mung ni de mung matut sharin sa wa na re lam;

Yaw shada ai lam gaw, KBC a masing hte maren; KBC kata shanglawm nga ai Lachid Hpungup/ Hpung Sr. srn. ni; Hpung masha ni myit mada nga ai Lachid Ga hte jai lang hkaw tsun lu na matu re lam Sr. Galau Ting Luk shiga jaw ai hku nna chye lu ga ai. KBC MNK

Photo/ Htoi Awng

NINGBAW NINGLA SHALAT SHARIN HPAWNG SHIGA

KBC Ningbaw Ningla Shalat Magam Dap hte Hope International hku nna woi awn ai Personal Leadership Development Training (PLD) sharin hpawng hpe May shata 8 kaw na 12 ya laman KBC ginjaw rung kaw sharin nga ma ai lam chye lu ai.

Dai sharin hpawng hta Ginwang (7) kaw na marai (21) tup sa du shanglawm ma ai lam, sharin hpawng ladaw 2 ning laman (3) lang a lahta de sa du lawm sai ni marai (21) hpe lekmat shagrau masat na re lam chye lu ai.

Matut nna Sammung, Kutkai, Mungmau Ginwang ni a matu shara mi, Putao, Nogmung Ginwang ni a matu shara mi kaw matut galaw sa wa na re lam shiga na lu ai. Photo/ Htoi Awng KBC MNK

JST ni Hpyen Yen Lakawn Lanawn hte Seng Nna KBC Rung Kaw Zuphpawng Hpawng

Joint Strategy Team (JST) ni a hpyen yen lakawn lanawn ai hte seng ai hkrum zup bawngban hpawng hpe 2017 ning May 10 ya jahpawt hkying 9:00 ten kaw na shana de hkying 4:00 ten laman KBC Ginjaw Rung kaw galaw lai wa sai.

Dai zuphpawng hta JST kaw lawm ai Wuhpung Wuhpawng ni kaw na lit nga ai ni, Jau, Hpungup, Saradaw, Bishop ni hte saw shaga da ai myitsu ni yawng (41) shanglawm ma ai.

Bawngban myit hkrum da ai lam ni gaw; hpyen yen ni a shawnglam hte seng nna grau mai kaja ai lam byin lu na matu, mungdan kata mungdan shinggan ni kaw na seng ang ai ni hte jahkrup sa wa na lam, hpyen yen nga wa ai a npawt gaw mung masa a majaw re hte maren mung masa hta hkan nna she JST ni yawng myit hkrum rap ra let amu jawm galaw sa wa na matu bawngban myit hkrum da ma ai lam chye lu ai.

JST kaw lawm ai hpyen yen karum wuhpung wuhpawng ni gaw; Bridging Rural Integrated Development and Grassroot Empowerment (BRIDGE), Kachin Baptist Convention (KBC), Kachin Relief and Development Committee (KRDC), Kachin Women Association (KWA), Kachin Development Group (KDG), Karuna Mission Social Solidarity (KMSS), Metta Development Foundation (Metta), Nyein (Shalom) Foundation and Wunpawng Ninghtoi (WPN) ni rai nna Hpyen yen ni hpe lakawn lanawn ai magam bungli hta myit hkrum let jawm galaw nga ai Wuhpung Wuhpawng re lam shiga na lu ga ai.
 Photo/ Htoi Awng (KBC MNK)

Sr. Wanghte Zawng Hkawng

5 MAY 2017

UNITED NATIONS POPULATION FUND HPUNG NI YUPTUNG JAHPAN HTE SENG NNA KBC RUNG DE SA DU AI SHIGA

Myen mung Yuptung jahpan hte seng nna Kata lam sawk sagawn hkawm ai United Nations Population Fund (UNEPA) hpung kaw na Mrs. Sarah Clarke, Mr. Paul Lund Steinheuer, Khin Zar Naing hte Kyi Kyi Lin ni gaw May 4 ya shani KBC Rung de sa du nna Ningbaw/ Amu Madu ni; Dap hpa-awn nkau mi, Waimaw, Myitkyina, Htingnai, Uru Sengmaw, Putao Ginwang ni kaw na Amu Madu nkau mi; Magam Gun ni hte sa du hkrum bawngban ma ai lam chye lu ai.

KBC hku nna tang madun dat ai lam gaw “2014 ning Myen Mung yuptung jahpan hta ai shaloi anhte Wunpawng myusha ni hpe amyu (12) hku masat da ya nna jahpan bang shangun ai hpe n hkap la lu ai lam” anhte KBC ni gaw 2014 ning, Uru Sengmaw Ginwang, Zupra Buga kaw galaw ai (37) Lang na Hpung Shawa Hpawng kaba kaw myit hkrum ta sharawt da ai hte maren “KACHIN” ngu ai hta amyu bawsang ni yawng lawm ai hku nna sha hkap la lu ai lam, 2014 Yuptung Jahpan hta masat ya ai Amyu hpan ni gaw Myen mung tingna mungchying sha ni myit hkrum nga ai hpe shabra kau ya ai lam re majaw; တို႔တာ၀န္အေရး (၃) ပါး kaw lawm ai တိုင္းရင္းသား စည္းလံုးညီညြတ္ေရး ngu ai bandung hte tsep kawp nhtan shai ai lam tsun htang dat sai lam chye lu ai.

Ndai Wuhpung Wuhpawng ni gaw 2014 ning Myen mung Yuptung Jahpan nau shuk mat nna tara shang ndau shana n lu mat ai majaw kata lam bai hkan sagawn hkawm ai ni rai ma ai lam Shiga na chye lu ga ai.